Að vanda verður boðið upp á heita glögg í Skipholtinu á Þorláksmessu. Við vonumst til að sjá ykkur sem flest!

Með jólakveðjum,
:)
Magga Dóra og Hjalli

Hvenær: Fimmtudaginn 11. desember klukkan 18:00
Hvar: Gróubúð, húsnæði björgunarsveitarinnar Ársæls, Grandagarði 1, 101 Reykjavík
Hverjir tala: Fulltrúi Ársæls, Vala Hauksdóttir fjarskiptasérfræðingur og Ríkharður Sigmundsson staðsetningarbúnaðarsérfræðingur.
Hvað svo: Sjávarréttahlaðborð á Sjávarbarnum.

Nánar á Tæknitátublogginu.

Hlakka til!
:)
MD

Þið tækitátur, takið frá þann 11. desember frá 18:00. Þá verður annar fundur Arctic Girl Geek Dinner.

Umræðuefni fundarins er tækni í björgunarstörfum.

Verið er að ganga frá stað og fyrirlesurum en ég læt ykkur vita strax og það er komið á hreint.

Bókiði endilega þær tátur sem þið þekkið að koma með og þið þekkið náttúrulega regluna: Strákar eru velkomnir í fylgd tæknitótu.

:)
MD

Hvet ykkur eindregið til að lesa bloggið hans Vilhjálms Þorsteinssonar.

:)
MD

Ég er á því að við eigum bara að skipta á sléttu við þennan mann.  Haldiði ekki að við verðum ennþá sneggri að byggja okkur upp á svona paradísareyjum?

En þar sem ég hef ekkert gáfulegt til málanna að leggja þá legg ég til að þið lesið færsluna hans Hjalla um næsta Ísland.

:)
MD

Sjá nánar á tæknitátublogginu og á Facebook.

Hlakka til! Bjarni viltu koma með?

:D
MD

Það hefur verið áberandi fyrir mig og margar vinkonur mínar að það hefur vantað jákvæðan félagsskap kvenna sem hafa verið kallaðar nördar/strákar/proffar og það allt sem hrós.  Sem betur fer eru þetta konur sem taka málin í sínar hendur og höfum við nú ákveðið að taka upp breska hugmynd: Girl Geek Dinner.

Girl Geek Dinner er félagsskapur ‘girl geek’ sem hittast reglulega og kynnast, hlusta á tæknilega fyrirlestra, borða góðan mat og lyfta jafnvel glasi. Hér er áherslan á að vera skemmtilegur, læra nýtt, kynnast fólki og vera góðar fyrirmyndir.  Ef að strákana langar að vera með, þá mega þeir gjarnan mæta á viðburði, í fylgd með félagskonu.

Eftir að fyrsti klúbburinn var stofnaður fyrir 3 árum hefur orðið borist eins og eldur í sinu um allar jarðir og má finna Girl Geek Dinner klúbba vítt og breitt um heiminn, frá Kanada til Nýja-Sjálands. Og nú er komið að Arctic Girl Geek Dinner.

Eitt af því sem við rákumst á þegar við fórum að skoða þetta var að við vissum ekki hvað við ættum að kalla ‘girl geek’ á íslensku.  Svo við fengum til liðs við okkur Baldur Sigurðsson dósent í íslensku sem er einnig faðir úrvals ‘girl geek’ og hann kom upp með orðið ‘tæknitáta’.  Um leið og ég heyrði það þá langaði mig að vera tæknitáta.

Svona félagsskapur lifir náttúrulega á því að skemmtilegar kjarnakonur vilji vera memm.  Ef þú vilt vera memm ekki vera feimin við að skrá þig í Facebook-grúppuna sem við bjuggum til eða hafa samband.

Stefnan er að hafa fyrsta hittinginn í nóvember - skráið ykkur og verið með!

:)
MD

Maður gerir alltaf ráð fyrir að fólk viti allt sem maður veit sjálfur.  Þó að þroskasálfræðin segi að það alist af manni snemma á ævinni þá held ég að það eimi ennþá af því í okkur öllum að gera ráð fyrir að við deilum sameiginlegri þekkingu. Að eitthvað sem okkur þykja sjálfsögð sannindi séu það fyrir alla.

EItt sem mér finnast sjálfsögð sannindi er munurinn á sálfræði og sálgreiningu.  En fyrir ykkur hin sem hafið ekki notið þess eins og ég að lesa Grunbaum þá ætla ég að gefa ykkur smá innsýn og nokkra linka til að kynna ykkur málið betur.

Sálfræði er vísindagrein sem fæst við að rannsaka heila og hátterni. Undir þennan hatt fellur meðal annars skynjun, persónuleikasálfræði, félagssálfræði, þróunarsálfræði og mannháttafræði (var að læra þetta orð!) sem ég hef sérhæft mig í.

Það sem flestir þekkja sálfræði sem er klínísk eða meðferðarsálfræði. Þetta er undirgrein sálfræðinnar sem fæst við að hjálpa fólki í gegnum áföll og kenna því að fást við lífið.  Það eru til ýmsar kenningar um það hvernig er best að standa að því en margítrekaðar rannsóknir hafa leitt í ljós að hugræn atferlismeðferð skilar bestum árangri.  Ein önnur leið sem fólk beitir í þessum tilgangi er sálgreining.

Sálgreining á rætur sínar að rekja til kenninga Freud um sjálfið.

Ekki verður dregin fjöður yfir að Freud var mjög áhrifamikill fyrir sálfræðina, hann kynnti meðferðarsálfræði inn í sálfræðina sem fram að því hafði einkum fengist við skynjunarsálfræði. Það verður hinsvegar ekki heldur dregin dul á að engin vísindaleg rök hafa fundist fyrir kenningum hans og meðferðin sem byggir á henni hefur í besta falli gefið jafn góða raun og spjall milli vina.

Það skal haldið til haga að ég er alin upp í mjög atferlismiðaðri sálfræðideild.  En í mínum sálfræðihroka jafnast sálgreining á við stjörnuspeki eða önnur hjávísindi.

:)
MD

Undanfarnar tvær vikur er ég búin að vera að kenna nemendum mínum um álag og streitu og áhrif þess á hugræna eiginlega okkar til að taka við upplýsingum og taka ákvarðanir.

Í umræðunni um stjórn risastórra opinna kerfa (eins og kjarnorkuvera eða flugumferðarstjórnarsvæða) er talað um að slík kerfi er gríðarlega erfitt að skilja og stjórna. Boðleiðir frá stjórnanda út í kerfið eru hliðrænar og svifaseinar. En það er kostur slíkra kerfa að vegna þess hvað þau eru svifasein er hægt að koma á góðu ferli til að halda þeim á réttum kili. Komi hinsvegar upp eitthvað atvik sem kemur þeim úr jafnvægi fer allt til fjandans. Stjórn slíkra kerfa er því yfirleitt (og sem betur fer) rútínubundin og tilbreytingarsnauð.

Eða eins og kennslubókin orðar það:
Hours of intolerable boredom punctuated by seconds of pure hell.

Það sem er athyglisvert útfrá mannlega þættinum hér er að þeir sem eru góðir í að stjórna stórum kerfum eftir ferlum og handbókum hafa auga fyrir smáatriðum (til að skilja minnstu breytingar í kerfinu) og gríðarlega sterka öryggistilfinningu (þeir fylgja reglunum). Til að ná stjórn á kerfi sem er komið úr jafnvægi þarf aftur á móti allt aðra eiginleika. Yfirsýn, hugsa út fyrir kassann, brjóta reglurnar.

Það er augljóst að þetta er ekki sama fólkið.

Og það sem við fórum að velta fyrir okkur var þetta: Hefur valist hér í áhrifastöður fólk sem er gott í að halda kerfi í jafnvægi eða að koma kerfi aftur í jafnvægi?

:)
MD